Maysa a lalaki ti nakemmeg gapu iti panaglabsingna iti Republic Act 10591 wenno Comprehensive Law on Firearms and Ammunition idiay Barangay Casili, Sto. Domingo.
Nabigbig ti suspek a ni James Viernes Romias, agtawen iti duapulo ket tallo, miembro ti Citizen Armed Forces Geographical Unit, taga-Barangay Sived, Sto. Domingo.
Iti pannaki-uman ti Bombo Radyo Vigan ken ni PLT Roger Retreta, nakaawat ti Sto. Domingo Police Station iti report nga adda maysa a lalaki a nakasuot iti camouflage nga agparpara iti lugan iti provincial road ti barangay a mangibagbaga kadagiti motorista nga agusar iti helmet; ta no saan ket matiketanda.
Nagresponde dagiti personnel ti nasao nga istasyon ket kiniddawda ti ID ken dadduma pay a dokumento a mangipakita iti turay nga agisayangkat iti tignay maipapan iti law enforcement, ngem saan a simmurot ti suspek, isu a napilitan dagiti pannakabagi ti linteg nga iwayat ti body search kenkuana ket nakumpiskar ti maysa a unit ti caliber 38 revolver, tallo nga ammunition, ken tallo a fired cartridges ti isu met la a kalibre.
Posible pay a mapilaan ti suspek iti kaso nga Usurpation of Authority gapu iti panagpammarangna a kameng ti PNP.
