VIGAN CITY – Pimmusay ti nagmaneho iti motorsiklo a nakadungpar iti lalaki a magmagna kaduana ti tarakenna a baka iti provincial road idiay Barangay Sagsagat, San Ildefonso idi rabii iti May 12, 2024.
Ti nagmaneho ti Yamaha NMAX motorcycle ket ni Jayson Borreta Belizar, agtawen iti tallopulo ket innem, baro, awanan ti helmet idi napasamak iti aksidente, tubo idiay Palao, Bangued, Abra ngem agdama nga agnanaed idiay Barangay Camestizoan, Sto. Domingo; ti backride na ket ni Ronnie Taclas Palado, agtawen iti tallopulo ket siam, baro, awan ti helmetna idi napasamak ti aksidente, a taga-Barangay Poblacion East, San Ildefonso; idinto a ti pedestrian ket ni Agusto Tabucao Peros, agtawen iti limapulo ket dua, baro nga agnaed idiay Barangay Padu Grande, Sto. Domingo.
Iti pannaki-uman ti Bombo Radyo Vigan ken ni PLt. Roger Retreta a Deputy Chief of Police iti San Ildefonso Municipal Police Station, agpapadaya ti motorsiklo idi nadanonda iti nasao a lugar ket saanna a napansin ti lalaki a magmagna iti sangoda kaduana ti tarakenna a baka isu a nadungparna iti likodna.
Segu ken ni Retreta, nadunor dagiti tallo isu a naipanda iti Northside Doctors Hospital, Guimod, Bantay babaen kadagiti nagresponde a kameng ti San Ildefonso Police Station ken Rural Health Unit personnel ngem bayat a matamtaming ti driver ti motorsiklo ket pimmusay idinto a naiyakar iti Ilocos Sur Provincial Hospital – Gabriela Silang ti pedestrian ta natukkol ti sakana.
Nagpalagip ni Retreta kadagiti motorista iti panagaramat ti helmet nu agmaneho para ti nayon a salaknib ken laglagipen nga itugot amin a dokumento a kasapulan tapno awan ti pagparikotan.
AUDIO – PLT. ROGER RETRETA
