Dead on the spot ti maysa a lalaki a nagaburan manipud iti kalkalienna nga abot idiay Barangay Fuerte, Caoayan, Ilocos Sur.
Nabigbig ti biktima a ni Reynante Regaspi, agtawen iti uppat a pulo ket walo, taga-Barangay Paratong, Sta. Catalina.
Nakaawat dagiti pannakabagi ti linteg iti report mainaig iti napasamak a panagreggaay iti daga iti Barangay Fuerte kangrunaan iti LJ Seaside Bistro and Transient House a kukua ni Josefa Rafanan Pimentel.
Nagresponde dagiti personnel ti MDRRMO ken BFP-Caoayan.
Maibasar iti inisyal nga imbestigasyon, agkalkali ti biktima iti kauneg a pito a kadapan iti nasao a lugar idin ta nagreggaay daytoy ket nagaburan.
Pinadas dagiti kaduana nga isalakan ti biktima ngem saanda a nagballigi.
Namuan babaen iti pannakipatpatang ti Bombo Radyo Vigan iti pamiliana a sakbay ti pannakatay ti biktima ket naitagtaginep ti asawana a nagaburan isu a pinaritanna a mapan agubra.
Ngem nupay kasta ket impilit latta ti biktima ti napan ket saanda a ninamnama a nagpaypayso ti tagtagainep ti asawana.
