VIGAN CITY – Dead on arrival ni Larry Montibon Igot, agtawen iti limapulo ket walo, mannalon, taga-Barangay 139 Bagong Barrio, Caloocan City gapu ti panangpaltog kenkuana dagiti saan pay nabigbig a riding-in-tandem suspect idiay Barangay Ayusan Sur, Vigan City.
Ti biktima ket miembro iti Salisi gang ken isu ti maysa kadagiti mapapati a nagtakaw idi September 24 iti nasurok maysa milion a pisos a gatad ti alahas ken kuarta iti Lucy’s Antique Shop, Calle Crisologo, Barangay 1, Vigan City a kukua ni Lucila Chan Barba, agtawen iti innem a pulo.
Iti pannaki-uman ti Bombo Radyo Vigan ken ni PLT. Christopher Bueno, karuruar ti biktima iti Bureau of Jail Management and Penology ta kapyanpyansana para iti kasona a theft.
Kadua ti biktima ti siumanna a babai a ni Lavinlialuz Villarino Diayon, agtawen iti uppat a pulo ket tallo, tubo iti Barangay Malapong, Buenavista, Agusan del Norte ta agur-urayda iti traysikel a paglugananda koma a mapan iti Vigan City Police Station idin ta dimteng dagiti suspek a nakamotorsiklo ket pinaltuganda ti biktima.
Nagsagaba iti tallo a tama iti paltog ti biktima kangrunaan iti barukong ken iti sillangna a puon ti nakatayanna.
Iti agdama, manarimaan ti panangkita dagiti pannakabagi iti linteg kadagiti CCTV para iti pannakabigbig dagiti suspek.
