Nagsinnungbat iti plenaryo ti Senado da Senador Panfilo Lacson ken Senador Rodante Marcoleta kalpasan a balawen ni Marcoleta ti kinaawan ti opisial a committee report agingga ita kasaruno ti serye ti panagdengngeg ti Senate Blue Ribbon Committee mainaig kadagiti maanomalya a flood control project iti pagilian.
Segun ken ni Lacson, naikkan ti tunggal senador ti initial report ket tunggal maysa kadakuada ket adda bukodna a kopya nga adda watermark ti opisina da.
Bimmwelta ni Marcoleta ket impaganetget na nga adda sumagmamano a kinakurang ti report ti komite ni Lacson partikular iti kinaawan ti napapateg a nagan kas ken ni Adrian Bersamin a dati a nagserbi kas Undersecretary ken Presidential Legislative Liaison Office (PLLO).
Imbutaktak pay ni senador Marcoleta ti maipagarup a panangipapilit dagiti kadua na a senador kas ni Senador Lacson a pro-China isuna.
