Vigan City – Simsimpaen ti Associated Labor Unions- Trade Union Congress of the Philippinews (ALU- TUCP) dagiti nayon a labor policies ken labor regulations iti kangitingitan ti COVID- 19 pandemic.
Ingunam-gunam ni ALU- TUCP spokesman Alan Tanjusay iti pannaki-uman kenkuana ti Bombo Radyo Vigan a saan a makanay dagiti agdama a maipatpatungpal a labor policies ken regulations tapnu masalakniban dagiti mangmangged kadagitoy a panawen isu a masapul a manayunan ken mapatibker dagiti nasao a pagannurutan ket agbalin a linteg a suruten iti amin.
Sumagmamano kadagiti kayat nga inayon ti TUCP a labor policy ket iti panang-disinfect wennu panangdalus kadagiti lugar a pagtrabtrabahuan dagiti empleyado, panangited dagiti employers ti personal protective equipment kadagiti mangmangged pakairamanan dagiti facemasks, sanitizers ken alcohol tapnu saan da a maapektaran ti COVID- 19.
Inlawlawag na nga uray nu simple laeng a banag dagiti kayat da a mainayon a pagannurutan, adu pay laeng dagiti employers ken business owners a saan a sumur-surot isu a masapul a mapagbalin a linteg dagiti kidkiddawen da tapnu sigurado a suruten ti amin.
