Kiniddaw ti Supreme Court (SC) ti gobierno nga agkomento iti maysa a petision mainaig ti panangisanod ti 2025 Barangay ken Sangguniang Kabataan Elections (BSKE) a saan a maitunos ti 1987 Philippine Constitution.
Imbilin ti SC ti Senado, Kamara, Executive Secretary Lucas Bersamin, ken Commission on Elections (COMELEC) a sungbatan ti petision nga impila ni election lawyer Romulo Macalintal.
Impaganetget ti pannakangiwat ti kangatoan a korte ti pagilian a ni Camille Ting a nasken a maipasa ti sungbatda iti petision ken prayer for temporary restraining order (TRO) iti uneg ti sangapulo nga aldaw.
Kiniddaw ni Macalintal iti Korte a mangiruar ti TRO wenno status quo ante order a mangbilin iti Office of the President nga isardeng ti pannangipatungpal ti linteg.
Segun ken ti beterano nga abogado ti eleksion, ti napirmaan a linteg ket nalawag a panaglabsing iti karbengan dagiti umili nga agbutos ken panaglabsing iti karbenganda iti impormasion a mangapektar iti constitutional rights-da.
