Ado nga Overseas Filipino Workers ti nadismaya iti kinaawan tignay ti administrasyon ni President Ferdinand Marcos Jr inaig kadagiti mapukpukaw a balikbayan boxes.
Segun iti grupo dagiti OFW, agingga iti agdama ket awan pay nangawag kadakuada uray nu nagsublisublidan iti opisina ti Senado tapno ikiddaw ti pannakaisayangkat ti imbestigasyon kadagiti rinibo a biktima dagiti mapukpukaw a balikbayan box
Mismo a ni Jeffrey Balsa- Chairman ti OFW Assistance ti nangidaulo a nangbirok kadagiti mapukpukaw a balikbayan boxes dagiti kailian ngem kunana nga agpipinnabasol dagiti cargo shipping company idiay abroad ken ditoy Pilipinas nu madamag nu apay a saan a nakadanon kadagiti naituding a destinasyon dagiti balikbayan boxes dagiti kailian.
Malaksid dayta, naamoan a baybay-an dagiti shipping company a ti Bureau of Customs ti mangikedkeddeng nu baybay-an wenno isubasta dagiti balikabayan boxes.
Maipalagip nga idi bulan ti Marso ket nangipila ni Sen. Lito Lapid ti resolusyon nga imbestigaran ti Senado ti reklamo ti rinibo-ribo a reklamo dagiti OFW inaig iti nasao nga isyu.
Basar iti Senate resolution No. 950, karaman iti kayat ni Sen. Lapid a masungbatan dagiti insidente ti pannakapukaw dagiti sumagmamano a linaon dagiti balikbayan boxes ngem agingga iti agdama ket saan pay a marikna dagiti OFW ti nadakamat nga addang.
