Pagpapatangan dagiti kongresista ti maipanggep iti kaawan ti nailatang a pondo para iti Ayuda para sa Kapos ang Kita Program (AKAP) iti salinong ti National Expenditure Program wenno NEP para iti sumaruno a tawen.
Segun ken ni House Committee on Appropriations Chairperson ken Nueva Ecija 1st District Representative Mikaela Suansing, kasapulan nga adda maymaysa a desisyon mainaig iti parikut iti AKAP.
Para ken ni Suansing, nakita kadagiti naglabas a tawen ti dakkel a naitulong ti AKAP kadagiti constituent dagiti kongresista nangruna kadagiti saan a karaman iti Assistance to Individuals in Crisis Situations wenno AICS.
Iti pannakaipasa ti NEP iti kamara ket inlawlawag ni Department of Budget and Management (DBM) Secretary Amenah Pangandaman nga awan ti pondo para iti AKAP iti 2026 ta adda pay nabatbati a pondo iti salinong ti 2025 budget.
