Naisayangkat ti Kick-off ceremony ti National Disaster Resilience Month ken ti panagrambak ti Ilocos Sur Resilience Festival 2026 iti Chavit Coliseum, Tamag, Vigan City.
Iti pannaki-uman ti Bombo Radyo Vigan ken ni Rhon Arquelada a Provincial Disaster Risk Reduction and Management Officer, ti nasao nga aktibidad ket nakipasetan dagiti participant wenno estudyante manipod DepEd Ilocos Sur ken DepEd Vigan, DRRMOs ken dadduma pay.
Segun ken ni Arquelada, naisagana iti duapulo ket pito nga Inter-active booths para kadagitiparticipants a pakaisuroan iti disaster preparedness ken disaster prevention activities.
Ti aktibidad pay ket nakaimbitaran dagiti kameng ti Bureau of Fire Protection, Philippine Coast Guard, Philippine Army, DOST, PhilSci, ken agduduma pay nga opisina iti PGIS.
Iti agmalmalem nga aktibidad ket naisuro kadagiti nakipaset iti panag-CPR, bandaging, recue, carry and transfer ken dadduma pay.
Malaksid iti kick-off activity ket mapaspasungadan ti pannakaisayangkat ti agduduma nga aktibidad kas paset ti Ilocos Sur Resilience Festival 2026 kas iti water-waste clearing, pruning iti kaykayo, tree planting activities, coastal clean-up, ken training iti drone.
