Inallukoy ni Senador Loren Legarda dagiti Pilipino nga ibilang ti disaster resilience kas laban kontra iti kinatalged iti pamilia iti pagtaengan, dagiti mannalon, ken mangngalap a masansan a maapektaran iti layos, bagyo ken dadduma nga epekto ti climate change, kagiddan ti panagrambak ti National Disaster Resilience Month.
Babaen ti tema a “Naghahanda at Kumikilos Tungo sa Panatag na Bagong Pilipinas”, impaganetget ni Legarda a ti pudno a resilience ket rumbeng a makita iti inaldaw-aldaw a biag ken maipatungpal kadagiti pagannurotan.
Kas nabayagen a mangiyet-etnag ti climate ken disaster resilience, ni Legarda ti kangrunaan nga akin-surat ken sponsor dagiti linteg a nangilatang iti pundasyon iti climate ken disaster governance framework.
Karaman dayta ti Republic Act 9729 wenno Climate Change Act of 2009 a nagaramid iti Climate Change Commission, RA No. 10174 wenno People’s Survival Fund Act a mangmangted iti napaut a pondo para iti community adaptation programs ken RA No. 10121 wenno Philippine Disaster Risk Reduction and Management Act of 2010 a mang-institutionalize iti komprehensibo a DRRM framework.
