VIGAN CITY – Umaboten iti sangagasut ti pakabuklan a kaso ti Covid19 iti Ilocos Sur ta adda nairekord a dua iti nagpatnag.
Ti maikasiam a pulo ket siam a pasyenteket agtawen iti sangapulo ket pito a babai, estudiante a taga – Brgy. Tablac, Candon City ti nainayon a kaso iti Covid19 ti Ilocos Sur isu nga umaboten iti siam a pulo ket siam ti pakabuklan a kaso.
Asymptomatic ti pasyente, awan ti travel history-na, nakapulapolna ti maikasiam a pulo ket innem ken maikasangapulo ket pito wenno dagiti agassawa a pasyente iti kallabes.
Gapu ti dayta, mangrugi iti November 17 agingga inton December 1 ket maidalan iti Extreme Enhanced Community Quarantine dagiti lugar a naibilang a critical zone, Modified Enhanced Community Quarantine dagiti lugar a naibilang a containment zone ken General Community Quarantine dagiti lugar a naibilang a buffer zone.
Kabayatanna, ti maikasangagasut a pasyente ket maysa nga agtawen iti duapulo ket walo a babai a taga-Brgy. Cadanglaan, Banayoyo, maysa a domestic helper ken returning resident.
Asymptomatic ti pasyente, adda travel history-na idiay Kingdom of Saudi Arabia, nai-expose kadagiti lugar a narisgo iti Covid19 ngem manmano laeng ti nakapulapolna.
Awan ti masurot a community containment strategy iti lugarda ta insigida a nai-isolate ti pasyente idi makasangpet ditoy probinsia.
