VIGAN CITY – Patien ni Provincial Quarantine Officer Martel Quitoriano a ti nagtaudan iti kaunaan a kaso ti African Swine Fever idiay Bario-an, Tagudin ket ti swill feeding wenno ti panagpakan iti tidtidda a taraon kadagiti taraken a baboy.
Iti pannaki-uman ti Bombo Radyo Vigan ken ni Quitoriano, posible a naala iti swill feeding iti ASF iti nasao a lugar ta no koma frozen meat wenno processed meat ket nagwarasen iti nasao a sakit iti nadumaduma a paset iti probinsia.
Kiddaw ti Quitoriano kadagiti agindeg ti Tagudin a kitaenda a nalaing ti tarakenda ken kiddawenna kadagiti Barangay official nga agridamda kadagiti masakupanda ta ipagelda pay laeng ti panagparti ken mangiruar iti tarakenda kabayatan iti panag-imbestigarda iti nagtaudan iti nasao a sakit dagiti baboy.
Kabayatanna, binilinen ti Provincial Government ti Provincial Quarantine Office tapno bantayan iti dadduma pay a paset ti probinsia tapno malapdan iti panagwaras iti ASF.
