Maragsakan nga inawat ti kampo ni Ramil Madriaga ti panangibasura ti Taguig City Prosecutor’s Office iti perjury complaint nga impila kontra kenkuana ni Vice President Sara Duterte.
Segun ken ni Atty. Mark Anthony Te, Abogado ni Madriaga, napateg a mangpatibker daytoy iti posision ti kliyente na ken pammaneknek a posible latta nga agpannuray ti kinapudno no patas a makita dagiti ebidensia.
Immuna a nangipila ni Duterte ti perjury complaint kontra ken ni Madriaga kalpasan a nagipasa ti affidavit iti Office of the Ombudsman a naglaon dagiti alegasion mainaig iti maipagarup a panangipatulod ti dakkel a gatad ti kuwarto iti sumagmamano nga indibidwal, kas panangsurot iti maipagarup a direktiba ti bise presidente.
Karaman pay kadagiti alegasion ti panang-organisar ti isip Pilipinas para iti plano na a Presidential bid idi 2022.
