Inikkat ti Department of Agriculture (DA) ti temporaryo a panangiparit ti panagangkat kadagiti manok ken dadduma pay a produkto manipod iti manok manipod Israel ken South Dakota idiay Amerika.
Segun ken ni Agriculture Secretary Francisco Tiu Laurel Jr., balligi a nalapdan ken nakontrol iti panagwaras dagiti kaso iti Highly Pathogenic Avian Influenza idiay Israel ken South Dakota.
Karaman kadagiti maipalubos a ma-import manen dagiti poultry meat wenno karne iti manok, day-old chicks wenno piyek a kapispissa, hatching eggs, ken semen wenno semilya iti manok a maaramat para iti artificial insemination manipod kadagiti dati nga epektado iti rehiyon kadagiti nasao a pagilian.
Ti addang ket manamnama a makatulong iti panangpapigsa manen iti suplay ti manok ken related products iti merkado.
