VIGAN CITY – Agtultuloy iti imbestigasyon dagiti kameng ti Cabugao Municipal Police Station tapnu maduktalan iti pudno a nakatayan ni Jhing Jhing Punio Sortido nga agtawen uppat a pulo ket maysa a nasarakan iti bangkay na iti sirok ti poon iti kaimito idiay Sitio Balungabing, Brgy. Turod Patac, Cabugao idi agsapa idi November 20.
Segun ken ni Police Captain Ramil Llarenas, hepe ti Cabugao Municipal Police Station, awan iti nakakita iti napasamak sakbay a nasarakan iti bangkay ti biktima a mabalin nga agtakder a kas kangrunaan a testigo ken awan pay iti CCTV footage a mabalin da kuma a kitaen tapnu masolbar iti kaso.
Innayon ni Llarenas a iti pannakaisayangkat iti post mortem examination iti bangkay ti biktima, awan iti nakita da a sabali a dunor a sinagrap ti biktima a rason iti pannakatay na, malaksid iti dunor iti rupa na.
Nainget nga im-imbestigaran da ti asawa ti biktima ta isu iti posible a makaited iti naan-anay a detalye a makatulong iti imbestigasyon kabayatan nga iyur-uray da iti resulta iti autopsy ti bangkay.
