Impaganetget ni Atty. Tony La Viña, spokesperson ni Senator Loren Legarda, nga awan ti umdas a pagbatayan a ti alegasion nga inusar ni senador Legarda ti posision na a tumulong iti negosio a solar power ti anak na a ni Rep. Leandro Leviste.
Segun ken ni La Viña, kasapulan ti aktual ken konkreto nga ebidensia tapno mapaneknekan nga adda illegal wenno saan nga umiso nga inaramid ni Legarda ken saan a mabalin a maibatay ti responsibilidad iti panagbalinna nga ina laeng.
Inlibak na pay ti alegasion a nausar, nasayang wenno natakaw ti pondo ti gobierno kadagiti proyekto a solar, kasta met ti kaadda ti “ghost electricity” ken monopoly kadagiti kontrata ti solar service.
Innayonna a saan a naipatungpal ti Solar para iti publiko gapu ta saan a naipaulog dagiti kasapulan a pagannurotan ken linteg ken dagiti lugar a saklawen daytoy, isu nga awan ti pinansial a lugi ti gobierno.
Kabayatanna, agtultuloy ti panagimbestigar ti Ombudsman kada Legarda ken Leviste mainaig kadagiti proyekto a solar a mapatta-patta nga aggatad iti P10 bilyon, ken binilinna ida a mangipasa kadagiti counter-affidavit kas paset ti preliminary investigation.
