Pinasingkedan ni Presidente Ferdinand Marcos Jr. nga agtultuloy ti pannakibinnulig ti gobierno ti Pilipinas kadagiti otoridad ti Czech Republic mainaig iti pannakakemmeg ni dati nga Ako Bicol Rep. Elizaldy Co idiay Prague.
Segun ken ni Marcos, nalapdan ni Co iti border ti Germany kalpasan a simrek manipud Czech Republic nga awan ti naan-anay a dokumentona, isu a saan a napalubosan a makastrek ket dagus a naisubli kadagiti Czech authorities.
Iti agdama, agtaltalinaed ni Co iti pagbaludan idiay Prague kabayatan ti panangiyurnos ti gobierno dagiti legal nga addang para iti panagsublina ditoy pagilian.
Ni Co ket dati a kongresista ti Ako Bicol Partylist a maysa kadagiti personalidad a maim-imbestigaran mainaig iti mapapati a flood control scandal.
