Pinainget ti gobierno ti panagsaganada kontra iti manamnama nga epekto ti super El Niño a mabalin a kumaro kadagiti sumaruno a bulan agingga iti katengngaan ti 2027.
Segun ken ni Palace Press Officer Atty. Claire Castro, binilin ni Presidente Ferdinand Marcos Jr. dagiti ahensia a mangipatungpal kadagiti addang tapno maliklikan ti panagkurang ti danum ken ti epekto ti tikag.
Agsagsagana pay ti Department of Environment and Natural Resources tapno masigurado ti suplay ti danum, maliklikan ti forest fire, makatipid iti enerhia ken masalwadan dagiti mangmangged kontra iti nakaro a pudot.
Makikamkammayet ti Department of Agriculture, National Irrigation Administration, Department of Energy ken Department of Budget and Management tapno mabigbig ti posible a nayon a pondo a kasapulan.
