VIGAN CITY – Manarimaan pay laeng iti imbestigasyon ti Bureau of Fire Protection- Bantay nu manu iti gatad na dagiti nadadael nga alikamen iti uneg ti nauram a sigud a consultation room idiay Bantay rural health unit.
Segun ken ni kay Fire S/Insp. Erwin Saludes, fire marshall ti BFP- Bantay, electrical short circuit iti mapapati a rason ti uram.
Nangrugi ti apoy iti nabay-bay-an a nakasaksak a window-type airconditioning unit iti nasao a kwarto agingga a nagkayamkam iti maysa met laeng nga split type aircon.
Inaklon ni Saludes a narigatan da a nangdepdep ti apoy ta nakakandado iti kwarto ken napuskolen iti asok idi nakasangpet da iti lugar.
Maysa pay kadagiti im-imbestigaran dagiti otoridad ket nu kasanu a nakasaksak dagiti nasao nga aircon uray nu awan iti mangar-aramat.
