Maidurduron iti Senado ti gakat a pagbalinen a kangrunaan nga option ti digital payment kadagiti transaksyon iti gobierno tapno mapadaras ti panagbayad ken panangiwaras ti pondo iti publiko.
Iti salinong ti Senate Bill No. 2330 wenno eBayad Act nga impila ni Sen. Christopher “Bong” Go, obligaren dagiti ahensia ti gobierno, government-owned and controlled corporations, local government units, state universities and colleges, ken dadduma pay a karaman ti linteg nga agawat ken agaramat ti interoperable digital payment systems iti koleksion ken panagruar ti pondo.
Sakup ti digital disbursement ti panagbayad ti sueldo, allowance, honoraria, cash assistance ken dadduma pay a gastosen iti gobierno, bayat nga obligaren a mangted ti digital payment options iti panagabayad iti buwis, permit fees, tolls ken dadduma pay a koleksyon iti gobierno.
Nakalanad pay iti gakat ti panagruar ti electronic official receipts wenno digital proof of payment tapno mapapigsa ti transparency ken nadardaras a ma-audit ti panagaramat ti national budget.
