VIGAN CITY – Manamnama nga inton April 22, 2024 iti panagsubli ti biahe wenno flight iti Dubai Airport.
Iti pannaki-uman ti Bombo Radyo Vigan ken ni Bombo International News Correspondent Jeric Batino nga adda idiay Dubai, gapu ti pannakalayos ti airport ket arigna kasla baybayen ti langana a gappuanan ti pannakakanselar dagiti flight.
Segun ken ni Batino, adda pay padana a Pilipino a taga-Narvacan nga agbiahe koma nga agturong Dubai ngem gapu ti layos a napasamak ket na-stranded.
Iti uneg ti tallo a tawenna idiay Dubai ket ibilangna a kakaroanen ti napasamak a layos idi Martes ta kellaat a nagpangato ti danum a nakaapektaran dagiti umili.
Inlawlawagna nga awan ti pagayusan ti danum wenno drainage isu a napaspas ti pannakalayos iti nasao a lugar.
Nupay kasta, nagaramat dagiti rescuer ti kayak tapno madanon dagiti tulonganda nga umili a naapektaran ket nabalakadan pay dagiti umili a saanda a magna iti layos ta posible a makuryenteda a kas kadagiti biktima pakairamanan ti tallo a Pilipino a nairaman a natay.
VIDEO – BINC JERIC BATINO
