Inlawlawag ti Department of Justice a ni laeng President Ferdinand Marcos Jr. ti mangngeddeng nu maikkan ti executive clemency ni Mary Jane Veloso nu kas bilang a makaawid iti pagilian.
Ti addang ket kasaruno ti panangkumpirmar ti DOJ nga opisyal a maiyakar ti kustodiya ni Veloso iti pagilian manipod Indonesia a nakaibaludanna gapu ti kasona nga adda kainaigan ti ilegal a droga.
Segun ken ni DOJ Spokesperson Assistant Secretary Mico Clavano, adu iti maikonsiderar ti kaso ta convicted ni Veloso iti drug trafficking ngem dakkel a tulong isuna ti kaso ti illegal recruitment kas maysa a witness.
Inlawlawag ti opisyal a saan a kasapulan ti pammallubos iti Indonesia nu mangngeddeng ti presidente a waya-wayaan ni Veloso.
Idi napan a lawas idi napan ti dadduma opisyal idiay Indonesia tapno pagbalinen nga opisyal ti pannakaiyakar iti kustodia ni Veloso.
Awan pay laeng iti sigurado nga aldaw iti panagawid ni Veloso ngem mangnamnama iti gobierno nga agpaskua ditoy pagilian.
