Ex-DPWH engineer Alcantara, na-cite in contempt gapu iti mapapati a panagulbodna mainaig kadagiti ghost project iti Bulacan

Na-cite in contempt ti dati a district engineer ti Bulacan 1^st District Engineering Office a ni Henry Alcantara iti agultuloy a panagdengngeg mainaig iti flood control project.

Impila ni Senador Erwin Tulfo ti mosyon kalpasan a nadlawda ti kanayon a panangitudtudo ni Alcantara ken panangipapilitna nga awan ammona kadagiti ghost project idiay Bulacan.

Inlawlawag met ni Alcantara, a dagiti proyekto a rimmuar iti General Appropriations Act laeng ti impatungpalda.

Ngem segun ken ni Tulfo, saan a daytoy ti rumbeng ken imposible a maipatungpal dagiti staff ni Alcantara dagiti proyekto a saan nga isuna a mismo ti nangaprubar.