Sinigurado ti mangidaulo ti Barangay Laslasong West, Sta. Maria, Ilocos Sur a nakasagana ti evacuation center iti lugarda no kas bilang kasapulan dagiti umili.
Dayta ket kagiddan ti marikrikna nga epekto ti saan a nasayaat a panniempo ken habagat.
Iti pannaki-uman ti Bombo Radyo Vigan ken ni Barangay Captain Ligaya Javier Foronda, awan pay laeng iti napan kimmamang iti evacuation center-da iti baet ti agtultuloy a tudona.
No pay kasta ket binalakadanna dagiti kalugaranna kangrunaan kadagiti agnanaed iti asideg iti karayan ken low-lying areas a no kumaru iti sitwasyon ket sisasagana latta iti evacuation center-da para kadakuada.
Kinuna ni Foronda a ti baet nga adda panagpangato ti lebel ti danum iti karayanda ket saan pay met a nangitunda iti layos iti masakupanda.
Innayonna a dagiti naiyanud a materyales para iti flood control project-da ket saan a naggapu kadagiti naaramiden a paset no diketdi dagiti mausarto pay laeng para iti nasao a proyekto.
