VIGAN CITY – Pinaltugan dagiti saan pay nabigbig a suspek ti maysa nga empleado ti Local Government Unit iti provincial road ti Barangay Poblacion, San Vicente, Ilocos Sur.
Nabigbig ti biktima a ni Roberto Alasaas Castillo, LGU utility worker, taga-San Sebastian, San Vicente.
Iti pannaki-uman ti Bombo Radyo Vigan ken ni Police Captain Pedro Halover iti San Vicente Municipal Police Station, agsagsagad ti biktma iti kalsada idin ta dimteng dagiti dua a lallaki a nagkalugan iti motorsiklo ket pinaltuganda ti biktima ngem nakapag-retaliate wenno nakabales ta adda met ikotna a caliber 45.
Kalpasan ti pammaltog ket dagus met a naglibas dagiti suspek.
Makikamkammayet ita ti San Vicente Police Station kadagiti kabangibang a police station ken dagiti ospital no bilang adda napan nagpaagas a biktima ti pammaltog ta saan pay a masinunuo no natamaan dagitoy wenno saan.
Narekobre manipud iti nakapasamakan ti pammaltog ti innem a fired cartridge ken maysa a deformed slug.
Maysa kadagiti pamalpalatpatan dagiti pannakabagi ti linteg a motibo iti pammaltog ket ti pangta a naawat ti biktima idi napan nga eleksyon a nangipilpilaanna iti kaso.
