VIGAN CITY – Dua a bag, pito a notebook, maysa a cellphone a mapatta-patta nga aggatad ti innem a ribo siyam a gasut siyam a pulo ket siyam a pisos, maysa a silver a kwentas nga aggatad ti tallo ribo a pisos ken kwarta nga aggatad ti walo ribo lima gasut a pisos iti mapapati a tinakaw ti saan pay nabigbig a suspek a simrek iti pagtaengan ni Visitacion Ildefonso nga agtawen ti pito pulo ket dua, balo, tubo ti Panique, Tarlac ngem agnanaed iti pagtaengan ni Filomina Harnois nga agtawen ti tallo pulo ket siyam, naasawaan ken agnaed idiay Barangay Bitalag, Tagudin idi alas nuwebe y media iti agsapa idi September 9.
Naduktalan ni Ildefonso a mapukpukaw dagiti napapateg nga alikamen ken kwarta da idi nakariing ket nadlaw na a nakalukat iti akin-sango a ruwangan iti pagtaengan a pagnanedan da ket nagkaiwara dagiti alikamen iti balkonahe isu a riniing na dagiti kabbalay na.
Maibasar iti inisyal nga imbestigasyon, saan a nakakandado ti gate iti pagtaengan ken awan ti sarra na iti balkonahe nga isu iti mapapati a simrekan ken rimuwaran dagiti agtatakaw.
Kabayatanna, tallo a cellphone a ti pakabuklan a gatad na ket lima pulo ket siyam a ribo a pisos, dua a laptop, maysa a stud ear cartilage nga aggatad ti sangaribo lima gasut a pisos ken kwarta nga uppat a ribo a pisos iti tinakaw dagiti saan pay nabigbig a suspek iti uneg ti pagtaengan ni Petra Soliven Galano nga agtawen ti innem a pulo ket tallo, naasawaan, midwife ken agnaed idiay Barangay Paratong, Sta. Cruz idi alas sais uno iti agsapa idi met laeng September 9.
Mapapati a ginundawayan dagiti suspek iti napigsa a todo idi kalman ket nakastrek da iti main door iti pagtaengan ket adda maysa a lalaki a nakita ti anak ti biktima a ni Sherwin Soliven Paguilingan a simrek iti kwarto na a naka-jacket ti nangisit ken naka-abungot iti rupa na isu a nagpukkaw ket isu metten iti panagtaray dagiti suspek a nangitaray kadagiti napapateg nga alikamen ken kwarta da.
