VIGAN CITY – Nadunor dagiti dua a nagkalubbon iti motorsiklo gapu iti pannakaidungparda iti Toyota Hilux a nakasinnabetda iti national highway ti Barangay Basug, Santa, Ilocos Sur.
Nabigbig ti drayber ti Suzuki Raider a motorsiklo a ni Gian Jessel Villanueva Hebrada, agtawen iti sangapulo ket siam, backride n ani Louise Andrew Alcos Racca, agtawen iti sangapulo ket walo, agpada a naka-helmet, agnaed iti Barangay Labut Sur, Santa.
Ti met Toyota Hilux a government vehicle ket minaneho ni Raizel Ordoniez Dedicatoria, agtawen iti tallopulo, government employee, taga-Barangay Bateria, San Esteban, inluganna ni Marilyn Dacubos, agtawen iti duapulo ket walo, government employee, taga-Barangay Dasay San Juan, La Union.
Agpapa-amianan ti Hilux idinto nga adda iti bangir a linya ti motorsiklo ket idi makadanonda ti nakapasamakan ti insidente, immagaw ti linya ti motorsiklo ket naidungpar iti akin-kannigid a paset ti Hilux ket naidarusdos iti laud a paset ti kalsada.
Nadunor ti nadumaduma a paset ti bagi ti drayber ti mototsiklo idinto a natukkol ti akin-kannigid a saka ken nadunor pay ti backride nan ga agpada a naipaagas iti ospital para iti pannakatamingda.
Nakainom dagiti nagkalubbon iti motorsiklo idi mapasamak ti insidente.
