Agpada a natay dagiti dua a menor de edad a lalaki a nagkalugan iti motorsiklo gapu iti pannakaidungparda iti railings iti kalsada idiay Barangay Laslasong, Sta. Maria, Ilocos Sur iti alas dose baente iti parbangon idi November 24, 2024.
Ti driver ken backride ket agpada a taga-Barangay Lingsat, Sta. Maria.
Iti pannaki-uman ti Bombo Radyo Vigan ken ni Police Major Macario Dulawan Jr. a hepe iti Sta. Maria Municipal Police Station, agpapaamianan a direksyon ti Suzuki Raider idin nadanonda iti Sta. Maria Centennial Bridge ket gapu ti kapaspas iti taray ti lugan, saan a nakontrol ti manibela ti driver isu a nag-overshoot ket timmama iti railings iti rangtay a gappuanan ti pannakaipurwakda iti kaadayo a duapulo a metro.
Segun ken ni Dulawan, agpada a naipan iti Ilocos Sur District Hospital – Narvacan dagiti dua ngem naideklarar a dead on arrival ti driver idinto a naipaagas pay laeng ti backride ngem pimmusay pay laeng.
Dagiti dua ket saan a nakasuot iti helmet ken naka-inom iti arak idi napasamak iti aksidente.
Nagpalagip ni Dulawan kadagiti motorista nga agannad iti panagmaneho ket nasaysayaat a saanen nga agmaneho nu naka-inom iti arak.
VIDEO – POLICE MAJOR MACARIO DULAWAN JR.
