Naipaagas iti ospital dagiti dua a drayber ken maysa a backrider ti motorsiklo a nagdinnungpar iti national highway idiay Barangay Poblacion East, San Ildefonso, Ilocos Sur.
Nabigbig ti drayber ti Honda Click 125 motorcycle a ni Lydon Tabangcura Ullero, agtawen iti duapulo ket siam, taga-Barangay Iboy, San Ildefonso.
Ti met nagmaneho iti Yamaha Sniper 150 ket ni John Dave Battad Tababa, agtawen iti duapulo, taga-Barangay Quimmarayan, Sto. Domingo, backrider-na ni Christel Jane Tababa Tolete, agtawen iti sangapulo ket walo, taga-Barangay Lussoc, Sto. Domingo, agpada nga awan suotda a helmet.
Iti pannaki-uman ti Bombo Radyo Vigan ken ni PEMS Jayson Sablay, agpapa-amianan ti Honda Click ket bayat ti panagsikkona nga agpakannigid, nagdinnungparda ti napaspas ti patarayna a Yamaha Sniper.
Nagsagaba iti dunor dagiti karaman ket naipaagasda iti ospital para iti pannakatamingda ket natalged metten dagiti dua a drayber ngem ti backride ti dumalan iti CT-Scan.
Agpada a nakainom dagiti dua a drayber idi napasamak ti aksidente.
