Dua a dati a nangato ti ranggona nga opisial ti Department of Agriculture-Bureau of Fisheries and Aquatic Resources (DA-BFAR) ti nangipila iti piyansa gapu iti uppat a kaso a graft nga inpila kontra kadakuada ti Office of the Ombudsman mainaig iti mapapati nga iregularidad iti P2 -bilion a vessel monitoring system project idi 2018.
P360,000 iti tungal maysa ti piyansa da dati a DA Undersecretary for Fisheries ken BFAR National Director Eduardo Gongona ken dati a BFAR National Director Demosthenes Escoto iti Antipolo City Regional Trial Court (RTC) kasukat ti temporario a wayawayada.
Intuding ti korte ti arraignment-da inton Enero 22 ken ti pre-trial inton Pebrero 26.
Naidarum da Gongona ken Escoto iti dua a panaglabsing iti Section 3(e) ti Republic Act (RA) No. 3019 wenno “Anti-Graft and Corrupt Practices Act”, ken maysa a panaglabsing ti tunggal maysa kadagiti Section 3(g) ken 3(j) ti isu met laeng a linteg gapu iti maipagarup a saan nga usto a pannakaited ti kontrata iti maysa a kompania ti Britania.
Nainaganan met kas akusado iti kaso ni Simon Tucker, CEO ti UK-based SRT Marine Systems Solutions Ltd (SRT-UK).
Nagpiyansa da Gongona ken Escoto idi Enero 6, maysa nga aldaw kalpasan ti panangipaulog ti Antipolo RTC iti arrest warrant kontra kadakuada.
Immuna a naipila dagiti kaso iti Quezon City RTC idi Disiembre 3 ngem nayakarda iti Antipolo RTC gapu iti isyu ti jurisdiction.
Nagtaud ti graft charges iti reklamo nga inpila ni Atty. James Mier Victoriano kontra kada Gongona, Escoto, Tucker, dati a DA Assistant Secretary Hansel Didulo, ken Chief Financial Officer ti SRT-UK a ni Richard Hurd.
