VIGAN CITY – Kaso a theft ti sangwen dagiti dua a nagtakaw iti 7 Eleven idiay San Antonio, Candon City a kukua ni Catherina Leal, agtawen iti tallopulo nga agnaed idiay Magsaysay District, Tagudin.
Nabigbig dagiti suspek a da Maricel Cambaliza, agtawen iti tallopulo ket siam ken ni Leny Ann Molina, agtawen iti duapulo ket walo nga agpada nga agnaed idiay Poblacion Norte, Santiago ken naaktuan nga agtaktakaw kadagiti produkto manipud iti nasao a pagtagilakuan.
Gapu ti dayta, pinaruar isuda ni Hans Gilbert Rosales, agtawen iti duapulo ket walo, maysa kadagiti store manager nga agnaed idiay Brgy Parian Este, Bauang, La Union.
Dagiti tinakawda a produkto ket dua a bote ti Soju, maysa a bote ti Vitamin Boost, dua a pakete ti chichirya, dua a bote ti 500 ml softdrinks, uppat a pakete ti tsokolate ken tallo a pakete ti milk chocolate.
Naipanen dagiti suspek iti Tagudin Municipal Police Station tapno dumalanda iti husto a proseso.
