Kaso a Reckless Imprudence Resulting to Multiple Homicide ken Multiple Physical Injuries with Damages to Properties ti sangwen ti drayber ti SUV a nakadungpar kadagiti 5 a motorsiklo iti national highway ti Barangay Gongogong, San Ildefonso a nakatayan dagiti 2 nga indibidual.
Dagiti motorsiklo a nadungpar ti SUV ket pakairamanan dagiti 3 a Honda Click 125, 1 a Yamaha NMAX, ken 1 a Yamaha Mio 110.
Iti pannaki-uman ti Bombo Radyo Vigan ken ni Police Captain Joseph Fieldad, Acting Chief of Police ti San Ildefonso Police Station, awan pay laeng ti inisial a nagpatangan dagiti karaman iti aksidente ngem isagsaganada lattan dagiti kasapulan a dokumento para iti pannakaipila ti kaso.
Iti agdama, maob-obserbaran ti drayber ti SUV iti ospital gapu iti dunor a sinagrapna.
Maipalagip a ginandat ti SUV ti nag-overtake ngem saanna a nadlaw dagiti lugan iti bangir a linya isu a nadungparna dagiti motorsiklo.
Naipaagas dagiti karaman iti aksidente iti ospital ngem natay dagiti agnobio a nagkalubbon iti motorsiklo.
