Natay ti maysa a drayber ti motorsiklo gapu iti pannaka-aksidentena iti barangay road idiay Pong-ol, Vigan City, Ilocos Sur.
Nabigbig ti drayber ti Rusi Flex 125 motorcycle a ni Christian Tabon Rimalos, agtawen iti duapulo ket walo, taga-Barangay Lubong, San Vicente.
Iti pannaki-uman ti Bombo Radyo Vigan ken ni PLTCOL. Reynaldo Mendoza Jr., agpapadaya ti motorsiklo a mapapati a napaspas ti tarayna, ket idi nagtengna ti nakapasamakan ti insidente, naawanan iti kontrol ti drayber iti minanehona ket naidungpar iti poste ti basketball ring iti abagatan a paset ti kalsada.
Nagsagaba iti dunor ti ulo ti drayber a naitaray iti balay pagagasan ngem dead on arrival.
Natakuatan a ti drayber ket napan nakiinom iti pagtaengan ti kabsatna a ni Marvin Rimalos idiay Barangay Barraca, Vigan City sakbay a napasamak ti pannakaaksidentena.
