Natay ti drayber ken dagiti dua a pasahero ti traysikel a nadungpar ti bus iti national highway ti Barangay San Pablo, Sto. Domingo, Ilocos Sur.
Nabigbig ti nagmaneho iti traysikel a ni Claro Vallejo Tapaya Sr., taga-Barangay Paras.
Dagiti inluganna ket da alyas Michelle, taga-Barangay Pagburnayan, Vigan City ken ni alyas Grace, taga-Barangay Bongtolan iti nasao a siudad.
Ti met drayber ti bus ket ni Julius Palma Jardinero, agtawen iti uppat a pulo ket dua, taga-Barangay Pagsanaan, Magsingal.
Iti pannaki-uman ti Bombo Radyo Vigan ken ni PLT. Roger Retreta, Deputy Chief of Police ti Sto. Domingo Police Station, nagsardeng ti traysikel iti daya a paset ti kalsada ket idi awanen dagiti aglabas a lugan nga agpa-amianan, nagsikko ti traysikel ngem saanna a nadlaw ti sumungad a bus nga agpaabagatan isu a nadungpar ida.
Gapu dayta, nagsagaba iti nakaro a dunor dagiti naglugan iti traysikel isu a naitarayda iti ospital ngem naideklararda a dead on arrival dagiti dua a pasahero ti traysikel idinto a natay bayat ti pannakatamingna ti drayber.
Saan met a naan-ano ti drayber ti bus ken dagiti pasaherona.
