Napilaan ti baro a kaso a kriminal ken administratibo iti Office of the Ombudsman ni Health Secretary Teodoro Herbosa ken sangapulo ket innem pay nga opisyal iti Department of Health (DOH) maipanggep iti mapapati a P1.5 billion a gatad ti expired nga agas ken bakuna a naibilang a dead stock.
Maibasar iti 33 pages a reklamo ti grupo a mangibagbaga ti concerned DOH personnel, naakusaran dagiti opisyal ti graft, serious dishonesty, grave misconduct, ken conduct prejudicial to public service.
Kiniddawda ti preventive suspension dagiti nasao nga opisyal.
Karaman iti reklamo iti mapapati a saan a naiwaras nga agas ken bakuna nga agtaltalinaed iti warehouse agingga na-expire pakairamanan dagiti agas para iti family planning, mental health ken HIV programs.
Iti reklamo, umabot iti P1.319 billion iti saan pay a naipatulod a bakuna idinto a sumagmamano a psychiatric medicines ken antiretrovirals ket nag-expire wenno dandanin madadael iti warehouse.
Saan pay a nagsarita ni Herbosa kadagiti pammabasol kenkuana.
