Pinasingkedan ti Department of Migrant Workers a kasapulanda iti supplemental budget tapno pondoian ti panangpaawid kadagiti Pilipino a naipit iti riribuk iti Middle East.
Iti panagdengngeg ti Senate Committee on Foreign Relations, sinaludsod ni Sen. Risa Hontiveros dagiti opisial ti DMW no kasapulan ti agipasa iti supplemental budget tapno matulongan dagiti overseas Filipino worker iti nasao a rehion.
Insungbat met ni DMW Secretary Hans Cacdac a kasapulanda daytoy ta saan a kabaelan ti pondoda dagiti repatriation request dagiti Pilipino manipud iti nadumaduma a pagilian iti Middle East.
Pinasingkedan ni Overseas Workers Welfare Administration Administrator Patricia Yvonne Caunan a P1.5 billion laeng ti agdama nga Emergency Repatriation Fund.
Innayon ni Caunan a ti repatriation cost kada Pilipino ket mapatta-patta nga umabot iti P135,000 agingga P140,000.
