Kayat ni Department of the Interior and Local Government (DILG) Jonvic Remulla a 60 years old ti retirement age dagiti miembro ti Philippine National Police (PNP).
Iti panagdenggeg ti House Committee on Appropriations iti budget iti DILG, impakaammo ni Manila Rep. Rolando Valeriano a nalpasen iti Kamara ti gakat a pagbalinen a 57 years old ti retirement age dagiti pulis manipod iti agdama a 56 years old.
Inlawlawag ti secretary a ngimmato ti life expectancy dagiti Pilipino manipod nagbalin a linteg ti Republic Act 6975 wenno Department of the Interior and Local Government Act of 1990 a nangiyetnag iti PNP manipod iti dati a Philippine Constabulary-Integrated National Police (PC-INP).
No man pay suportaranna a pagbalinen a 57 years old ti retirement ages dagiti pulis, ti nasao a tawen ket productive pay laeng dagiti pulis ken kabaelanda pay laeng nga agserbi kadagiti umili.
Patien ti secretary a no agretiro ti pulis iti tawen a 60 ket adu pay iti maaramidanda ken maitulong iti PNP kangrunaan ket baknangda iti ammo ken kapadasan a mabalinda nga ipasa kadagiti naub-ubing a pulis para iti pagsayaatan ti serbisio dagiti umili.
No pay kasta, gapu ta 57 years old ti impasa ti Kamara ket suportaranna dayta ngem mangnamnama nga in-inut nga ipangato ti Kongreso ti retirement ages dagiti pulis agingga umabot iti 60 years old.
