Inallukoy ti maysa nga agpampandaylinteg ti Department of Information and Communications Technology tapno adalen ti SIM Registration Act agsipud agraira pay laeng dagiti text scam.
Insingasing ni Camarines Sur Representative Luis Raymund Villafuerte ti pananglimitar ti bilang dagiti government-issued ID a mabalin nga iparang dagiti SIM registrant.
Innayonna a masapul a pasayaaten dagiti otoridad ti anti-cybercrime efforts da ken maaddaan iti nasaysayaat a wagas tapno kemmegen dagiti tattao nga adda iti likudan ti text ken online scam.
Immunan a binabalaw ni Senador Sherwin Gatchalian ti agtultuloy a panagraira ti text scam idi napan a tawen a dagiti biktima ket umabot iti 600,000.
Kinontra ti senador ti singasing a mangimandato iti in-person appearance para iti SIM registration, ta patienna a saan a naannayas para kadagiti konsyumer isu a nagpaawag iti Senate inquiry mainaig iti text scam.
