Insingasing ni Education Secretary Sonny Angara nga ikonsiderar ti Pilipinas nga agipatulod kadagiti top students nga agadal iti ballasiw-taaw kas paset ti suporta ti gobierno kadagiti gifted learners.
Segun ken ni Angara, 1% laeng kadagiti “best and the brightest” ti pagilian ti mabenbenispisyaran government support babaen kadagiti science high school.
Iti agdama, aktibo nga agtartrabaho ti Department of Education (DepEd) a mangbukel kadagiti programa para kadagiti high-achieving students kas sungbat kadagiti naduktalan manipud iti Second Congressional Commission on Education (EDCOM 2).
1.03% laeng kadagiti 27 a milion nga estudiante a Pilipino ti nakaenrol kadagiti special science programs, kas iti Philippine Science High School System ti Department of Science and Technology.
Kabayatanna, kinuna ni EDCOM 2 Executive Director Karol Yee a limited slots laeng ti programa a rason a manglaplaped kadagiti talented students a maka-access ti full academic potential ti pagilian.
Patien ni Angara a makatulong ti government-sponsored international scholarship program a kas ti programa ti Singapore.
