Inaprubaran ti Department of Budget and Management (DBM) babaen ti panangidaulo ni Secretary Amenah Pangandaman ti 16,000 a baro a teaching positions kadagiti pampubliko a pagadalan para ti School Year 2025-2026 kas tignay iti bilin ni President Ferdinand Marcos Jr. a papigsaen ti sektor iti edukasyon.
Ti 16,000 a baro a posisyon ket paset iti umuna a tranche ti target a 20,000 teaching positions para ita a tawen.
Iti sabali a biang, ti 15,343 a baro a posisyon ket Teacher 1 wenno Salary Grade 11.
Dagiti teaching post para ti Senior High School ket maipan iti division level para iti flexible a deployment kasaruno ti pagannurotan nga immunan nga inruar ti DBM idi 2016.
Segun ken ni Secretary Pangandaman, ti nasao nga addang ket suportar iti Department of Education (DepEd) tapno mapapigsa ti workforce iti Kindergarten, Elementary, Junior High School, Senior High School ken Alternative Learning System.
Mapatta-patta a P4.194 billion ti pondo a nailatang para kadagiti baro a posisyon nga agtaud iti built-in appropriations iti DepEd iti salinong ti 2025 General Appropriations Act.
Iti agdama nga School Year 2024-2025, impakaammo ti DepEd a nasurok 27.012 million nga agad-adal ti naka-enroll iti elementarya ken high school iti intero a pagilian pakairamanan ti Alternative Learning System.
