Saan nga anamongan ni dati a Rep. France Castro iti Alliance of Concerned Teachers ti affirmation ti Court of Appeals iti criminal convictions kadakuada ni dati a Bayan Muna Rep. Satur Ocampo para iti child abuse gapu iti pannakainaigda iti mapapati a trafficking kadagiti 14 a menor de edad idiay Talaingod, Davao del Norte idi 2018.
Maibasar iti decision, pinatibker ti appellate court ti Tagum City Regional Trial Court Branch 2 ruling a mangsentensia kada Castro ken Ocampo iti uppat agingga innem a tawen a pannakaibalud gapu iti panaglabsingda iti Republic Act 7610 wenno ti Special Protection of Children Against Abuse, Exploitation and Discrimination Act.
Iti pannaki-uman ti Bombo Radyo Vigan ken ni Castro, saanda nga awaten ti pangngeddeng isu a mangipilada iti motion for reconsideration ta mamatida a saan a nakita ti korte ti ebidensia nga indatagda a dagiti Lumad school ket adda idi iti salinong ti militarisasyon.
Inkalintegan ni Castro nga isuda ti nangispal iti biag dagiti estudiante ken mangisursuro idi panawen a naisawang ni dati a Presidente Rodrigo Duterte a puoranna dagiti pagadalan.
Impasigurado ti dati a kongresista nga aramidenda amin a legal a wagas tapno maabsweltoda iti nasao a kaso ta mamatida nga awan ti inaramidda a panagabuso kadagiti ubbing, no di ket inispalda laeng ida manipud iti peggad.
Maipalagip a nagtaud ti kaso manipud iti trafficking complaint kontra kada Castro, Ocampo, ken 17 a dadduma pay gapu iti pannakipasetda iti National Solidarity Mission idiay Talaingod idi November 2018 ket napabasul ida iti iligal a panangitugot kadagiti menor de edad iti nasao a misyon.
