Inaprubaran ti Philippine Amusement and Gaming Corp. (PAGCOR) ti dandani 40, 000 nga aplikasion dagiti gamblers a nangibaga nga iparitan ti bukod da a bagi iti panagpusta kadagiti casino ken online gambling platform.
Segun ken ni PAGCOR Chairman at CEO Alejandro Tengco, dakkel ti ngimmatoan ti bilang dagiti aplikasion iti napalabas nga innem a bulan kalpasan a papigsaen ti ahensia dagiti programa iti Hunyo.
Manipud iti dati a nakurang a 2, 000 nga aplikasion, umabot iti dandani 40, 000 dagiti naaprobaran, a segun ken ni Tengco ket mangipakita daytoy nga epektibo ti sistema ti gobierno.
Iti salinong ti programa, mabalin a boluntario nga ag-apply dagiti indibidwal a kayat na a lumiklik iti sugal, idinto a mabalin met nga agkiddaw dagiti asawa, nagannak ken annak nga adda iti husto a tawen-na nga iparitan dagiti kabagyan da nga adda problema na iti sugal.
