Naragsakan ti Department of Agriculture (DA) iti panangaprobar ti Kamara iti naisingasing a budget a PhP216.1 billion para inton sumaruno a tawen.
Segun ken ni DA Secretary Francisco Tiu-Laurel, Jr., ti naaprobaran a budget ket mangipakita ti panagngato iti PhP39.4 billion nu yarig iti orihinal nga alokasion a PhP176.7 billion.
Manamnama a mangipaay ti approved budget iti nalawlawa ken epektibo a pannakapapigsa ti imprastruktura a mangsuporta iti agrikultura, a tulbek tapno mapaadu ti produksion ken matgedan dagiti mannalon ken mangngalap.
Paset ti nalawlawa a budget realignment ti pannaka-allocate ti nasao a budget kas maitunos iti pammilin ni Presidente Ferdinand R. Marcos, Jr.
Nakaituding a mailatang iti Office of the Secretary iti nasurok a limapulo ket pito a porsiento wenno PhP22.5 Bilion manipud iti PhP39.4 Bilion a panagngato ti budget ti ahensia, idinto a ti nabatbati a nakurang nga uppat a pulo ket tallo a porsiento wenno PhP16.9 Bilion ket maipaay iti panangsuportar iti panagmula manen ti niyog, panangpasayaat ti crop insurance tapno masalakniban ti ad-adu a mannalon, panangpasayaat kadagiti fish port tapno mapasayaat ti kalidad ken kinadalus dagiti ikan, farm-to-mill road para kadagiti lugar a pagmulaan ti unas, ken post-harvest facility tapno maliklikan ti pannakadadael ti apit kalpasan ti panagapit. Augie Arellano
