Natuloy ti Career Service Examination (CSE) iti Region 1 iti baet ti natudo a panawen gapu ti habagat idi August 9, 2026.
Iti pannaki-uman ti Bombo Radyo Vigan ken ni Marina Garcia a Provincial Director iti Civil Service Commission – Field Office Ilocos Sur, uray sumagmamano a testing center iti pagilian ti nagsuspenso iti nasao nga exam ket natuloy iti Ilocos Sur babaen iti pannakaisayangkat idiay Ilocos Sur Polytechnic State College (ISPSC) – Candon City ken Ilocos Sur National High School (ISNHS) iti Vigan City.
Segun ken ni Garcia, manipod iti rehistrado iti Professional ken Sub-Professional Level iti Vigan City a 1,650 ket 1,500 wenno 90.91% iti naka-exam idinto nga idiay Candon City ket 1,327 iti nagrehistro ngem 1,129 wenno 85.7% iti naka-exam.
Saan a pinaglibakan ni Garcia nga adu iti karit a simmangbay idi Domingo ta adu kadagiti examinee ken test administrators iti narigatan nga agbiahe ken narigatan a makasapa para iti exam.
No pay kasta ket naannayas iti pannakaisayangkat iti eksaminasyon ta iti baet nga adda dagiti classroom a nagsapri gapu iti tudo ket adda dagiti naisagana a classroom a nakayakaran dagiti nag-exam.
