Imbasura ti Court of Appeals ti impila a petisyon ni Cassandra Li Ong a mangkukwestyon ti resolusyon a kasoan isuna ti qualified human trafficking gapu iti pannakairamanna illegal Philippine Offshore Gaming Operators (POGO) operations idiay Porac, Pampanga.
Iti pito a panid a pangngeddeng ti Court of Appeals 13th Division a pinirmaan ni Associate Justice Pablito Perez, impaganetget ti korte a saan nga umanay wenno maawat ti inlawlawag ni Ong ta saan a dimmalan iti husto a proseso.
Segun ti Court of Appeals, rumbeng a dumalan pay iti Department of Justice (DOJ) ni Ong tapno kwestyunaranna ti nasao nga addang ken saan nga insigida nga agderetso iti appellate court.
Kas mayataday iti rules of court ket kasapulan nga agipila iti motion for reconsideration kangrunaan nu adda ti nasao nga option.
Nagtaud ti kaso kontra ken ni Ong manipod complaint-affidavit a naipila idi napan a tawen iti DOJ ket sumango iti reklamo a panaglabsing ti Anti-Trafficking in Persons Act of 2022.
Kinuna ni Ong a saan a naikkan ti due process idi inkeddengna nga insigida iti DOJ panel of prosecutors a ma-indict isuna iti krimen.
