VIGAN CITY – Nalpasen iti naisayangkat a contact tracing kadagiti nakapulapol ti mapapati a covid19 patient ti ili ti Santa.
Basar ti pakammu manipod kenni Mayor Jesus “Popoy” Bueno Jr, pakabuklan a duwa pulo ket walo a tattao iti mapapati a nakapulapol ti pasiente ken naikkaten ti total lock down idiay Brgy. Calungbuyan ngem maimplementar laengen ti lockdown kadagiti tallo pulo ket siyam a pagtaengan.
Regular iti panangmonitor dagiti opisyales ti barangay ken municipal health office kadagiti agnaed iti nasao a barangay a naisakop ti localized lockdown tapno maipasigurado a natalged iti kasasaad iti salun-at da.
Manamnama a rimmuar iti resulta ti confirmatory swab testing ti pasiente sakbay a malpas daytoy a lawas ket no negative iti resultana maikkaten iti localized lockdown kadagiti pagtaengan.
Nagpalagip ti Mayor iti agtultuloy a panagannad dagiti tattao ti ili ti Santa ken iti panangsurot dagiti maipapatungpal a minimum health standards.
