Nadunor ti maysa a babai kalpasan a binagsol ti asawana idiay Barangay Bucalag, ili ti Santa.
Ti biktima ket agtawen iti tallopulo ket siam, beautician, idinto a ti suspek ket ti asawana nga agtawen iti uppat a pulo, construction worker, agpada a residente ti nadamakat a barangay.
Iti pannakiuman ti Bombo Radyo Vigan ken ni PLT Ryan Polca, DCOP ti Santa Police Station, pinasingkedanna a rummuar ti biktima iti banyo da idi kellaat lattan a kinomprontar ti asawana a nakaiggem ti getteng.
Idi mannarimaan ti komprontasion, nangala ti suspek ti kutsilyo ken inlayat na iti asawana.
Segun ken ni Polca, pinadas a liklikan ti biktima ti komprontasion ngem in-corner isuna ti suspek ken nabagsol dagiti imana.
Naipan ti biktima iti balay pagagasan para ti naan-anay a pannakatamingna idinto a nakemmeg ti suspek iti pagtaenganda babaen kadagiti nagrepsonde a kapulisan.
Kabayatanna, narekobre ti kutsilyo a naaramat iti insidente nga adda kaatiddog na a 12.5 a pulgada.
Rumrummuar a mapapati a selos ti rason no apay a naaramid ti suspek a bagsolen ti asawana.
Iti agdama, naipilan ti kaso nga attempted parricide a sangoen ti suspek.
