Nagpanawagan ti Commission on Elections kadagiti kandidato iti May 2025 elections nga agboluntaryo a mangikkat kadagiti illegal campaign material ta no saan ket mabalinda a ma-disqualified.
Dayta ti pinasingkedan ni Comelec Chairman George Erwin Garcia kasaruno ti pannakaisayangkat ti ‘Oplan Baklas’ kagiddan ti pannakairugi ti uppat a pulo ket lima nga aldaw ti local campaign period.
Inlawlawag ni Garcia a ti Fair Elections Act ket imandatona iti komisyon a mangipatulod iti surat kadagiti kandidato tapno kiddawen nga ikkaten ti illegal campaign paraphernalia-da.
Kabayatanna, impasiguradona met a nakapia ti panangrugi ti local campaign period.
Immunan nga inallukoy ni Garcia dagiti lokal a kandidato a suroten dagiti pagannurotan nga intuding ti Comelec para iti natalged ken naballigi a pannakaisayangkat ti midterm elections.
