Impasimudaag ni Department of Public Works and Highways (DPWH) Secretary Manuel Bonoan a posible a mangisayangkat ti cleansing wenno panangdalus iti organisasyon nu kasapulan tapno maikkat dagiti korap nga opisyal ken kameng iti baet ti agtultuloy a panangtratar ti mapapati a maanomalya a flood control projects.
Segun ken ni Bonoan, kitkitaenen dagiti opisyal ti ahensya ken district engineers a karaman iti inferior ken ghost flood control projects a posible a pakaipilaan kadagiti mayannatup a kaso ken sanctions tapno agbalin a leksyon iti amin ken saandan a palubosan a mapasamak pay ti nasao a banag.
Iti agdama ket naduktalan nga agtultuloy iti audit ti ahensya iti flood control projects a mapapati a ghost projects ket idiay Bulacan kangrunaan iti Engineering District 1 iti probinsia.
Kabayatanna, impatangken ti secretary nga urayenna ti pangngeddeng ni Pres. Ferdinand Marcos Jr. nu kasapulanna nga ag-leave pay laeng bayat nga agtultuloy iti imbestigasyon.
